Саҳми шаҳрдорӣ дар дастурхони идона

Раёсати шаҳри Душанбе 30 сентябри соли ҷорӣ зимни як ҷаласаи ихтисосӣ дастурҳои хешро барои ғанӣ гардонидани дастурхони идонаи сокинон ба ифтихори Иди Қурбон ба масъулин ироа намуд.

Шавкат Саидов, котиби матбуотии раёсати шаҳри Душанбе ба рӯзномаи Миллат гуфт, ки рӯзҳои 3 - 4 октябри соли 2014 мутобиқ ба он бо ҷалби потенсиали Корхонаҳои воҳиди давлатии «Оид ба истеҳсол, харид, захира ва фурӯши маҳсулоти ниёзи аввалия дар шаҳри Душанбе», «Бозори Шоҳмансур», «Бозори  Саховат», «Бозори Деҳқон» ва «Бозори Қарияи боло» ва дигар бозорҳои хусусӣ дар тамоми бозорҳои дар марзи шаҳр фаъолияткунанда ярмарка- фурӯши маҳсулоти кишварзию саноатӣ доир мешавад.

Зимнан  Маркази назорати давлатии санитарию эпидемиологии шаҳри Душанбе, Раёсати назорати давлатии байтории шаҳри Душанбе ва Раёсати хадамоти давлатии оташнишонии шаҳри Душанбе вазифадор шуданд, ки назорати санитарию эпидемиологӣ, ветеринарӣ ва беҳдошти маҳсулоти кишоварзӣ ва чораҳои зиддисӯхториро дар бозорҳои истеъмолии шаҳр пурзӯр намоянд.

Фирдавси Давлат, «Миллат»