Аҳмадинажод ҳам аз Фаластин ҳимоят мекунад

Намояндаи вазорати умури хориҷаи Эрон Рамини Меҳмонпараст гуфтааст, ки президенти Эрон Маҳмуди Аҳмадинажод дар Ассамблеяи 66-уми СММ ширкат ва суханронӣ хоҳад кард.

Ҷои зикр аст, ки Маҳмуди Аҳмадинажод соли гузашта дар ҳамчунин ҷаласаи СММ ширкат ва суханронӣ намуда буд, ки он боиси сару садои зиёд гардид. Он замон президенти Эрон гуфт, ки дар таркиши биноҳои баландошёна дар шаҳри Ню-йорк дар 11 сентябри соли 2001 маъмурияти Кохи Сафед худ даст дорад ва мурод ин буд, ки то бад- ин васила ба кишварҳои мусалмонӣ, аз ҷумла Ироқу Афғонистон ҳамла бикунанд. Он вақт ҳайати намояндагии ИМА бо нишони эътироз ҷаласаи СММ- ро тарк карда буданд. Интизор меравад, мавзӯи аслии ҳамоиши қарибулвуқӯъи СММ истиқлол ва ба расмият шинохтани давлати Фаластин бошад. Аллакай аксари кишварҳои дунё ҷонибдории худро аз баррасии ин масъала изҳор доштаанд. Мегӯянд, ки Русия низ тарафдори эътирофи мустақилияти Фаластин шудааст. Ҳамзамон ИМА аз кишварҳои дунё хостааст, то аз тасмими СММ дар мавриди шинохти расмии Фаластин пуштибонӣ накунанд.