"Тоҷик Эйр" барои таъхири парвозҳо аз мусофирон узрхоҳӣ кард

Ширкати ҳавопаймоии "Тоҷик Эйр" барои таъхири парвозҳо аз мусофирон расман узрхоҳӣ кард.

Азиз Хайруллоев, сухангӯи ширкат хабар дод, ки 28 ноябр ба далели номусоидии вазъи ҳаво ҳавопаймои самти Москва-Душанбе дар фурудгоҳи Хуҷанд нишаст. Дар ниҳоят мусофирони самти парвози Душанбе-Хуҷанд ва Душанбе-Москва натавонистанд, дар фурсати муайяншуда ба манзилу макони худ расанд.

"Аз номи ширкати "Тоҷик Эйр" мо аз ҳамаи мусофирони ду парвози зикршуда маъзаратхоҳӣ мекунем", - мегӯяд Азиз Хайруллоев.

Ба иттилои ширкат, соати 08:00 рӯзи 28 ноябр сабти мусофирон ба ҳавопаймои Душанбе-Хуҷанд шуруъ шуд, аммо ҳавопаймо соати 22:30 дақиқаи рӯзи 28 ноябр парвоз карданд.

"Барои ба эътидол овардани парвозҳо ширкати "Тоҷик Эйр" тасмим дорад, ки дар фурсатҳои наздик се ҳавопаймои навъи Bombardier, як ҳавопаймои навъи CRJ-200 ва ду ҳавопаймои навъи Bombardier CRJ – 900 харидорӣ кунад", - иттилоъ дод Азиз Хайруллоев.