Бародар хоҳари 19 солаи худро дар Кӯлоб кушт

Вазорати корҳои дохилаи Тоҷикистон аз қатли фоҷиабори як духтари 19 сола дар минтақаи Кӯлоби вилояти Хатлон хабар додааст.

Тибқи иттилоъи сайти расмии ин вазорат, ки рӯзи 22 июл пахш шудааст, Парвина Сабзаеваи 19 сола аз сӯйи бародараш буғӣ шудааст. Ин сайт менависад, ки дар робита ба ин ҳодиса кормандони милитсияи минтақа парвандаи ҷиноӣ боз карда ва бозрасон таҳқиқоти онро анҷом медиҳанд.

Мақомоти милитсия мегӯяд, ки таҳқиқоти муқаддамотӣ даракгӯ аз он аст, ки ангезаи ин қатл "хусумати бародар алайҳи хоҳар" буда ва ҷасади духтари ҷавон дар рӯдхонаи Ёқсуи ҷамоъати Кӯлоб ёфт шудааст.

Ин дар ҳолест, ки мақомоти зидахл аз афзоиши ҷароими қатл дар ним солаи аввали соли 2013 дар кишвар хабар додаанд.