«Облава» дар Восеъ боиси сӯхтани зане бозорнишин шуд

Дар ноҳияи Восеъ ба ҳангоми амалиёти «облава» дар наздикии бозори маркази ноҳия як ҷавон фирор карда, аз болои деги тафсони равғани «пирожки» -паз меҷаҳад. Дар ҳамин ҳолат деги равған чапа шуда, ҳам ҷавон ва ҳам зане, ки «пирожки» мепӯхт, сӯхтааст.

Бино ба иттилои шоҳидони айнӣ занро ба бемористон интиқол дода,ҷавон агарчӣ низ ба гуфтаи бархе аз шоҳидон аз миён поёнаш сухтааст, аз тарси «облава» ба бемористон нарафта, ба хонаашон, ки ба қавле дар деҳаи Тугараки ноҳияи Восеъ воқеъ будааст, панаҳ бурдааст.

Ба қавли бархе аз хабарҳои расида зани осебдида Муҳаббат ном дошта, рӯзи худ ва чаҳор фарзандашро, ба танҳоӣ бо тиҷорати хурд дар бозор мегузарондааст.

Ҳам навбатдори ВКД, ҳам навбатдори РКД дар Хатлон ва ҳам навбатдори ШКД-и ноҳияи Восеъ аз ин ҳодиса изҳори бехабарӣ кардаанд.  

Аз ШКД-и нохияи Восеъ ба мо ваъда доданд, ки ҳодисаро таҳқиқ хоҳанд кард ва баъдан иттилоъ хоҳанд дод. Ҳодисаро хабарнигори мо пайгирӣдорад.