Имомхатибони солманд барои омӯзиш ба Қатар рафтанд

Шӯрои уламои Тоҷикистон гуруҳи имомхатибони масҷидҳои Тоҷикистон иборат аз 18 нафарро барои омӯзиши забони арабӣ ба Қатар фиристодааст.

Бо назардошти ин, ки ҷараёни салафия дар Қатар чун дигар кишварҳои шайхнишини ҳошияи Халиҷи Форс нуфуз дорад, Шӯрои уламо ба хотири эҳтимоли гароиши муллоҳои тоҷик ба ин ҷараёнҳо, имомхатибонеро интихоб кардааст, ки солхӯрда ва дар мазҳаби ҳанафӣ устувор мебошанд.

Атовулло Қосимов, сухангӯи Шӯрои уламои Тоҷикистон ба радиои «Озодӣ» гуфтааст, барои омӯзиши забони арабӣ бар иловаи 18 нафар имомхатибон, ҳамчунин як нафар аз Дастгоҳи президент ва Кумитаи дини кишвар, дар маҷмуъ 20 нафар барои омӯзиши забони арабӣ ба давлати Қатар фиристонида шудаанд. Ба гуфта ин манбаъ, давраи омӯзишии мазкур рӯзи 3-юми апрел ба анҷом мерасад. Ин гуруҳи имомхатибон тақрибан як моҳ қабл аз ҷониби Шӯрои уламо ба Қатар фиристода шудаанд.

Гуруҳро Эшони Сайидҷони Сорбон, раиси Шӯрои уламои вилояти Хатлон ва муовини раиси Маркази исломии Тоҷикистон ва ҳамчунин намояндаи Кумитаи дини назди ҳукумати Тоҷикистон раҳбарӣ доранд.

Дар ҳамин ҳол рӯзномаи сиёсии "Ал-Араб"-и Қатар хабар додааст, ки гуруҳе аз имомхатибони тоҷик, ки ҳамакнун дар як давраи кӯтоҳмуддати якмоҳа дар масҷиди ҷомеи ба номи Муҳаммад ибни Абдулваҳҳоби давлати Қатар ҳузур доранд, аз равишҳои таълимӣ ва усулҳои таблиғотии он изҳори қаноатмандӣ карданд.

Ба навиштаи сомонаи «Озодӣ» бархе аз таҳлилгарони масоили мазҳабӣ дар Тоҷикистон гуфтаанд, ки азбакси дар Қатар равияи салафия нуфуз дорад, ҳангоми таҳсили забони арабӣ шояд имомхатибони Тоҷикистон зери таъсири ин ҷараён, ки дар Тоҷикистон манъ карда шудааст, қарор бигиранд.

Аммо Атовулло Қосимов, сухангӯи Шӯрои уламои Тоҷикистон дар робита ба ин масъала гуфтааст, қабл аз он, ки ин гуруҳ ба Қатар фиристода шавад, масъалаи эҳтимоли гароиш ба мазҳабҳои дигар ба эътибор гирифта шуд ва имомхатибоне интихоб шуданд, ки солхӯрда ҳастанд ва дар ақидаи ҳанафӣ устувор мебошанд.

Вай ба унвони намуна Эшони Сайидҷони Сорбонро мисол овард, ки бисёр руҳонии қавӣ аст ва дар ақидаи ҳанафӣ устувор мебошад. Шурои уламо аз фиристодани имомхатибони ҷавон ба хотири эҳтимоли гироиш ба мазҳабҳои дигар дар Қатар, худдорӣ кардааст.

Дар ин давраи омӯзишӣ бар иловаи аз худ намудани забони арабӣ, имомхатибҳо аз аҳкоми таҷвид, тиловати Қуръони карим, тафсир, ҳадис, фиқҳ, сирати Паёмбар(с), усули даъват ва илмҳои ҷомеашиносӣ низ омӯзиш мебинанд. Гуруҳи 18 нафараи имомхатибони тоҷик қарор аст, ки ҳафтаи дигар ба Тоҷикистон баргарданд.