Амрико аз сар задани "ҷанги обӣ" дар Осиёи Миёна ҳушдор додаст

Шӯрои миллии ҷосусии Амрико сар задани даргирӣ миёни кишварҳои Осиёи Миёна дар заминаи баҳсҳои обӣ то соли 2030-юмро аз эҳтимол дур намедонад. Ин нукта дар гузориши ҷадиди Шӯрои миллии ҷосусии Амрико, ки 10-уми декабр дар Вашингтон нашр шудааст, қайд гардидааст.

Шӯрои миллии ҷосусӣ, маркази таҳлилҳои стратегӣ дар ҳукумати Амрико ба шумор рафта, ҳар чор сол барои президенти тозаинтихоби Амрико гузориши таҳлилӣ оид ба равандҳои глобалӣ дар ҷаҳон таҳия мекунад.

Дар гузориши нави 140 саҳифагии Шӯро таъкид шудааст, ки то соли 2030-юм захоири обӣ дар сатҳи байналмилалӣ ба яке аз манбаъҳои асосии суитафоҳумҳо табдил хоҳад ёфт. Муаллифони гузориш қайд мекунанд, ки то соли 2030-юм талабот ба ғизо 35 дарсад, ба об 40 дарсад ва энержӣ 50 дарсад афзоиш меёбад. Баробари ин аҳолию хушксолиҳо ва таъсироти  манфии тағйироти иқлимӣ низ бештар мегардад. Ба ҳамин далелҳо Шӯрои миллии ҷосусии Амрико мегӯяд, таҳдиди сар задани даргириҳо миёни кишварҳо бузург аст.

Таҳиягарони гузориш эҳтимоли даргирӣ ва шиддат ёфтани баҳсҳои обиро, махсусан дар минтақаҳои Осиёи Миёна, Африқои шимолӣ, Шарқи наздик ва Чини шимолӣ пешбинӣ мекунанд.

Ин гузориш дар ҳоле нашр мешавад, ки масъалаи обу энергетика дар Осиёи Миёна баҳсбарангез буда, роҳбарони аршади минтақа барои ҳалли он ишораҳо ба истифодаи силоҳ кардаанд.

Ислом Каримов, раисиҷумҳури Узбакистон, моҳи сентябри соли ҷорӣ зимни сафараш дар Қазоқистон ҳушдор дода буд, ки агар кишварҳои болооби Осиёи Миёна, ҳангоми сохтмони иншооти бузурги гидроэнергетикӣ манфиати кишварҳои поёнобро сарфи назар кунанд, ин ба ҷанг хоҳад расонд. Бархе аз коршиносон ин изҳороти Каримовро ҳамчун ҳушдор аз истифодаи силоҳ барои ҳалли баҳсҳои обию энержӣ дарёфта буданд.

Аммо чанд рӯз пеш Ислом Каримов дар як ҷаласаи бахшида ба рӯзи Қонуни асосии кишвараш гуфтааст, онҳо пуштибони "ҳамсоядории хуб"-анд ва мехоҳанд, масоили баҳсбарангези минтақа аз тариқи гуфтугӯ ҳал шавад. Бино ба қавли расонаҳои Узбакистон, Ислом Каримов  таъкид намудааст, дар шароити кунунии минтақа, ки суитафоҳумҳо афзоиш меёбанд, аз сиёсати "ҳамсоядории хуб" ва муколама истифода шавад.