Ёқуб Салимов мариз аст

«Аз дина рӯз, ки бо бачам дар зиндон дидор доштам, дигар чизе аз гулӯям намегузарад. Ёқубҷон мариз аст, поҳош дард мекунанд, як бор духтуро пешаш нарафтаанд», - мегӯяд Ашурбӣ Салимова, модари вазири собиқи умури дохилаи Тоҷикистон, собиқ раиси гумруки кишвар ва сафири пешини Тоҷикистон дар Туркия Ёқубҷон Салимов, зимни як нишасти матбуотӣ, ки баъд аз зӯҳри имрӯз дар меҳмонхонаи «Авесто» баргузор шуд. Бону Салимоваи 86-сола афзуд, чанде қабл ба назди президент рафта будам, аммо иҷозаи вуруд ба пеши ӯро надодаанд.

Бояд гуфт, ки Ёқуб Салимов то ҳанӯз дар боздоштгоҳи муваққатии вазорати адлия нигаҳдорӣ мешавад.Ин ҳам дар ҳолест, ки аз рӯзи эъломи ҳукми додгоҳ, ки ӯро барои 15 сол равонаи зиндон кардааст, беш аз 8 сол сипарӣ шудааст. Шӯҳрат Қудратов, вакили мудофеъи Ёқуб Салимов гуфт, ки то он ҷое ки ман иттилоъ дорам тибқи қонун Салимов баъди баромадани ҳукми суд бояд ба маҳбасхона равона карда мешуд. Аммо бо сабабҳои номаълум ӯро та ба ҳол дар боздоштгоҳи муваққатӣ ё ба истилоҳ СИЗО- и Вазорати адлия нигоҳ доштаанд. Вазифаи аввалиндараҷаи ман ин аст, ки ин қонун бояд амалӣ гардад. Чунки аз нигоҳи қонун дар СИЗО нигоҳ доштани Ёқуб Салимов ғайриқонунӣ мебошад.