Даргузашти афсари амниятии Русия дар Душанбе

Як афсари Хадамоти амниятии Русия рӯзи 31-уми август дар меҳмонхонаи “Ҳаят реҷенсӣ”-и Душанбе даргузаштааст.

Дар ин бора Муҳаммадулло Асадуллоев, сухангӯи Вазорати умури дохилаи Тоҷикистон ба Радиои Озодӣ хабар дода ва гуфтааст, ки Владимир Кузнетсов, афсари 38-солаи амниятӣ ҳанӯз 26-уми июл ба Душанбе омада, таъмини амнияти сафари Медевдев ба Тоҷикистонро баррасӣ мекард.
Ҷаноби Асадуллоев сарусадоҳо дар бораи масмумият ё заҳролудшавии ин афсари амниятии Русияро рад кард ва гуфт, ки ӯ бар асари бемории қалб фавтидааст.
Ба қавли сухангӯи Вазорати умури дохилаи Тоҷикистон дар бораи бемории Владимир Кузнетсов ҳамроҳонаш низ хабар доштаанд.
Даргузашти як афсари Хадамоти амниятии Русия дар Душанбе дар ҳолест, ки сафари раисиҷумҳури ин кишвар, Дмитрий Медведев ба Тоҷикистон шоми имрӯз, 1-уми сентябр оғоз меёбад.