Ваъдаи Алӣ Солеҳ тазоҳургарони яманиро қонеъ накард

Бо вуҷуди ин ки раисҷумҳури Яман Алӣ Абдулло Солеҳ дар рӯзи шанбе ба тазорҳургарон аз сари қудрат рафтани худро эълом карда буд, тазоҳурот имрӯз дар Яман идома дошт. Рӯзи шанбе Алӣ Абдулло Солеҳ пас аз тазоҳуротҳои ду моҳаи кишвараш бо пешниҳоди кишварҳои арабии Шӯрои ҳамкориҳои Халиҷи Форс барои канорагирӣ аз қудратро пазируфт. Бар асоси ин тарҳ, раисҷумҳури Яман бо шарти масуният аз пайгарди қонунӣ, дар муддати як моҳ қудратро ба муовинаш месупорад.

Эътилофи нерӯҳои мухолифини Яман ин пешниҳодро бо баъзе аз мулоҳизот пазируфтанд. Аммо баргузоркунандагони тазоҳурот имрӯз талаб карданд, то Алӣ Абдулло Солеҳ фавран истеъфо диҳад ва ӯро ба ҷавобгарии ҷиноӣ бикашанд. Муҳаммад Абдул Ҳамид Шарбонӣ, як тазоҳургари яманӣ мегӯяд:" Алӣ Солеҳ, як дурӯғгу аст. Мо ба ӯ бовар надорем. Ӯ 33 сол боз дурӯғ мегӯяд. Ӯ ҳеҷ гоҳ рост намегуфт. Агар ӯ қобили эътимод мебуд, як ду дурӯғ мушкил надошт, вале мо ба ӯ бовар надорем."