Рамзи расмии Наврӯз тасдиқ шуд

Дар Тоҷикистон нахустин самбул ё рамзи наврӯзӣ аз сӯйи раиси ҷумҳури  кишвар ба унвони нишони расмии Наврӯз дар кишвар таъйид шуд.

Ин нахустин нишони расмӣ ва доимии Наврӯз дар Тоҷикистон хоҳад буд, ки ба гуфтаи раёсати ҷумҳурии кишвар аз ин ба баъд дар ҳамаи наврӯзгоҳҳо дар канори ороишҳои дигари наврӯзӣ ва баҳорӣ ба чашм хоҳад расид.

Барои таҳияи нишонҳои наврӯзии сарисинагӣ низ аз ин рамз истифода хоҳад шуд.

Тибқи иттилоъи раёсати ҷумҳурии Тоҷикистон нишон ё рамзи таъйидшудаи наврӯзӣ бо кумаки олимон таҳия шудааст. Гуфта мешавад, ин нишон ба шакли кураи замин аст, қутбҳои шимолу ҷануб, нурафшонии офтоб, оғози бедоршавии табиат, айёми киштукори донаҳои умед ва фасли баҳору шукуфоӣ ва ҳамчунин тоҷи заррини Нишону Парчами Тоҷикистон таҷассум ёфтаанд.

Барномаи расмии ҷашни Наврӯз дар шаҳри Душанбе, дар наврӯзгоҳи ҷадиди пойтахт, ки дар маҳалли майдони аспдавонӣ (иподром) бунёд шудааст, баргузор хоҳад шуд.