Дар Ирон мехоҳанд Каррубӣ ва Мусавӣ қатл шаванд

18 феврал дар шаҳри Теҳрон бо мусоидати давлати Ирон гирдиҳамоие баргузор гардид, ки дар он тарафдорони ҳукумат нисбат ба мухолифин изҳори «адоват» намуданд.

Дар пайи намози ҷумъа, тавре телевизиони давлатии Ирон намоиш додааст, издиҳоми бузурге бо шиорҳои зидди Амрикову Исроил ба сӯи майдони Инқилоб мерафтанд. Тазоҳургарон ҳамчунин кушта шудани раҳбарони мухолифини Ирон Мирҳусейн Мӯсавӣ ва Меҳдии Каррубиро талаб кардаанд. Чунин намоишҳо дар шаҳрҳои дигари Ирон низ доир шудааст. Ин ба дунболи тазоҳуроти рӯзи 14 феврали мухолифин аст, ки даҳҳо ҳазор нафарро гирд овард ва бар асари даргириҳо бо нирӯҳои амниятӣ  ду нафар кушта шудаанд. Каррубӣ ва Мӯсавӣ ҳарду аз ҳамон рӯз таҳти ҳабси хонагӣ қарор доранд.