Намояндагони порлумони Қирғизистон хостори фурӯши об ба ҳамсоякишварҳо шуданд

Хабари хуб 07.02.2019 12:52

Порлумони Қирғизистон масъалаи истифодаи пулакии захираҳои оби ин кишварро барои Узбекистону Қазоқистон ба баррасӣ кашид.

Вакилони порлумони Қирғизистон тарҳи қонун "Дар бораи ворид кардани тағйирот ба бархе аз санадҳои ҳуқуқии Қирғизистон (Кодекси об, қонун "Дар бораи об")"-ро ба баррасӣ гирифт. Ҳадафи асосии ин тағйирот пулакӣ кардани истифодаи захираҳо ва иншооти обии кишвар аст.

 Бархе аз вакилон пешниҳод карданд, ки аз Узбекистону Қазоқистон барои истифодаи оби Қирғизистон маблағ талаб карда шавад.

Аз ҷумла Умбеталӣ Қидиралиев намояндаи порлумон ин кишвар гуфт: “наздики 22 миллиард метри мукаъаб оби обанборҳои Қирғизистон ҳамасола ба Узбекистону Қазоқистон меравад. Яъне, бештар аз 80 дарсади об ба ҳамсояҳо дода мешавад. Чанде пеш мо мехостем, барои таъмири обанбори Токтогул 450 миллион доллар ҷудо кунем. Чаро ҳукумати мо аз ҳамсоякишварҳо талаб намекунад, ки барои сарбанд маблағ пардохт кунанд?”.

Жанибек Карималиев муовини вазири кишоварзии Қирғизистон посух дод, ки бо ворид кардани тағйирот ба қонунҳо имкони талаб кардани пардохт барои истифодаи об аз ҳамсояҳо пайдо мешавад.

Карималиев гуфт, Қазоқистон барои истифодаи об наздики 313 ҳазор доллар пардохт мекунад. Масъалаи танзими истифодаи об дар солҳои 2007-2008 бо ширкати кишварҳои ҳамсояи Қирғизистон баррасӣ шуда буд, аммо он замон ин масъала ба нафъи Қирғизистон ҳал нашуд.

Манбаъ: радиои Озодӣ

©2008 - 2019 "Миллат" - рӯзномаи ҷамъиятӣ сиёсии Тоҷикистон. All right reserved.

Нишонӣ: Ҷумҳурии Тоҷикистон, шаҳри Душанбе, хиёбони С. Шерозӣ 16 ошёнаи 2
E-mail: info@millat.tj, millat@inbox.ru Tel: (+992)37-88-111-97