Муфтӣ: Арзон кунед!

Муфтии мусалмонони Тоҷикистон бо интишори як байния аз тоҷирону фурӯшандагони бозорҳо даъват карда, ки дар моҳи рамазон қиматҳоро пойин бибаранд.

Дар ин бора Саидмукаррам Абдулқодирзода, раиси Шӯрои уламои исломии Тоҷикистон, рӯзи сешанбеи 24-уми июн ба Би-би-сӣ хабар додааст. Вай гуфта, ки ин баёния аз сӯйи бархе аз тоҷирони шаҳри Душанбе низ имзо шудааст.

Саидмукаррам Абдулқодирзода афзудааст: "Мутаассифона, мушоҳида мекунем, ки ҳамасола дар моҳи Рамазон дар бозорҳо қимати маҳсулоти ғизоӣ боло меравад. Мо даъват кардем, ки тоҷирони тоҷик аз барои савоб аз боло бурдани қиматҳо худдорӣ кунанд ва то ҳадди имкон нархҳоро пойин бибаранд."

Ҳамасола шаҳрдории Душанбе низ дар остонаи моҳи рамазон чунин баёнияе интишор медод. Ҳарчанд то оғози моҳи рамазон чаҳор рӯз боқӣ монда, вале шаҳрдорӣ дар ин замина то ҳол иқдом накардааст.

Зимнан, бо тасмими Шӯрои уламои исломии Тоҷикистон моҳи рамазон рӯзи шанбеи 28-уми июн оғоз мешавад.