Додгоҳи ноҳияи Исмоили Сомонии пойтахт раиси Шӯрои уламоро бе гуноҳ эълон кардааст.

22 феврал ҳукми ниҳоии судшаванда Саидмукаррам Абдулқодирзода бо даъвои Тураҷонзодаҳо қироат шуд. Саранҷом ҷаноби Абдулқодирзода дар ин баҳси судии наздик ба як моҳ, сафед шуд. Даъвогар Ҳоҷӣ Акбар Тураҷонзода, пас аз анҷоми мурофиа изҳор доштааст: "Гӯё, ки ҳеч гуна калимоти таҳқиру ҳақорат ба унвони хонаводаи Тураҷонзодаҳо гуфта нашудааст. Ягон аъзои Шӯрои уламо ҳам инро нагуфтаанд. Пас қариб 40 лафзи таҳқиромезе, ки дар ҳаққи мо сурат гирифт ва он аз даҳони кӣ баромадааст, мутаасифона ба инаш ҷавоб наёфтем. Акнун эшони муфтиро ба Худо месупорем".

Дар мавриди шикоят бурдан ба зинаҳои болоии додгоҳ Ҳ.А. Тураҷонзода афзудааст, ки барои ба судҳои аврупоӣ муроҷиат кардан, чанд марҳилаи дохили Тоҷикистонро мебояд пушти сар кард. "Акнун намеарзад ва сабр мекунем. Агар дар ҳаққи мо зулм карданд, қасди бад доштанд, Худо ҷазояшон медиҳад. Агар нофаҳмида нафаре маҷбур карда бошад, Худо аҷрашон диҳад", -гуфтааст Тураҷонзода.

Аммо Бузургмеҳр Ёров, вакили мудофеъи даъвогар мегӯяд, аз ин ба баъд ин ҳукми суд ба он замина мегузорад, ки судшавандаҳо пурра аз ҷавобгарӣ озод шаванд. Яъне нафаре, ки 40 маротиба дар ҳаққи зерҳимояаш тӯҳмат зада буд, дар охир сафед шуд. Ӯ афзудааст: "Ояндаи наздик, шикоятҳоро навишта пешниҳод мекунем ва то зинаҳои болоии суд муроҷиат хоҳем кард".